Türkmenistandan Hytaýa soňky 8 aýda 6 milliard Amerika dollary möçberinden köpräk tebigy gazyň satylandygynyň hasabatyny Ruslaryň TASS habar agentligi berdi. Bu möçber geçen ýylyň görkezijisi bilen deňeşdireniňde 5%-lik artyş görünýär.

10 ýyllardan bäri satylyp gelinýän tebigy gazyň hasabatyny Türkmenistanda ýaýymlanmagyny görmek mümkin däl, ýurduň girdejileriniň ýurda gelip-gelmeýänligi nämälim. Ýöne, çykarylyp bilinjek bir netije-de şudyr, halkyň ýarymy daşary ýurtlarda işläp gazanç edýär. Galan ýarysy bolsa ýurduň içinde garyplyk içinde ýaşamaga dowam edýär.

Aşakdaky suratlar Çärjewiň Gök bazarynyň çykyşynda düşürildi. Çagaly aýllaryň we garrylaryň dilegçilik edýän ýurdunda sosial hyzmatlaryň ýokdugyny arkaýynlyk bilen aýtmak kyn däl. Sosial hyzmatlaryň ýokly bir ýana, çäresizlikden dilegçilek edýänleri hukuk-daşy işleýän sözde polisiýanyň agzalary yzygiderli basyş edýär. Şol basyş edýänleriň birisiniň ady Maksat diýip bize habar berildi.

Dünýäde tebigy gazy boýunça birinji onlugyň içine girýän ýurduň halky garyplykdan we çäresizlikden ejir çekýärkä, ýurtda “asuda asman” syýasatynyň hem dowam edýän bolmagy adamlary ep-esli pikirlendirýär. Türkmenistanyň tebigy resurslary kime ýa-da nirä gidýär diýilen sorag-da barha manydar bolmagyny güýçlendirýär.